सुर्खेत । कालीकोटको पँलाता गाउँपालिका– ९ वालुवास्थित कर्णाली नदी तर्ने क्रममा एकजना युवक बगेर वेपत्ता भएका छन् । बालुवा बजारदेखि पचालझरना गाउँपालिका–६ नानिकोट जानका लागि नदी तर्ने क्रममा युवा बगेर वेपत्ता भएका हुन् ।
डुंगा पल्टिँदा मुगुको छायाँनाथ रारा नगरपालिका वडा नं १० निवासी २३ वर्षीय देवनाथ सेजवाल नदीमा वेपत्ता भएको जिल्ला प्रहरी निरीक्षक किशोर केसीले बताए । ‘तीन वटा ड्रम जोडेर बनाइएको डुंगा चढेर नदी पार गर्ने क्रममा नदीमा खसे,’ उनले भने, ‘चार जना चढेको डुंगा ढल्किँदा देवनाथ नदीमा खसेछन् ।’
प्रहरी निरीक्षक केसीले स्थानीय र प्रहरीले खोजी गरिरहेको भए पनि नभेटिएको जानकारी दिए । कर्णाली करिडोरको कालिकोट पलाता–९ मा पर्ने घाटपारी चौरदेखि बाजुराको लैफूसम्म ११ किमी चट्टान विष्फोटनसहित नेपाली सेनाले जिम्मा लिएर निर्माण गरिरहेको छ ।
उक्त सडक हाल घुमाउरो बाटो हुँदै नानिकोटको बोलु गाउँबाट घाटपारी चौर झारिएको छ ।
दर्शन खबर । ३ चैत्र २०८१, सोमबार