कर्णाली प्रदेश सहित आज यी स्थानमा हिमपातको सम्भावना

सुर्खेत । सुदूरपश्चिम र कर्णाली प्रदेशका केही स्थानमा सोमबार पानी पर्ने अनुमान गरिएको छ। जल तथा मौसम विज्ञान विभागका अनुसार सुदूरपश्चिमका थोरै र कर्णालीका एक दुई स्थानमा हल्का पानी पर्नसक्ने सम्भावना देखिएको हो। यी दुई प्रदेशका उच्च पहाडी तथा हिमाली भूभागका केही स्थान तथा बाँकी प्रदेशको हिमाली भागमा हल्का हिमपात हुने सम्भावना छ। अन्य स्थानमा भने आज दिन भर मौसम आंशिक देखि सामान्य बदली रहने विभागले जनाएको छ। आज राति पनि सुदूरपश्चिम, कर्णाली र लुम्बिनी प्रदेशको एक–दुई स्थानमा हल्कादेखि मध्यम वर्षा हुने र उच्च पहाडी तथा हिमाली भूभागमा हिमपात गराउने प्रणाली सक्रिय रहेको मौसम पुर्वानुमान महाशाखाले जनाएको छ।दिउँसो पनि देशका केही स्थानमा हल्का पानी पर्नसक्ने अनुमान गरिएको छ। मंगलबार देशको पहाडी भू-भागमा आंशिक देखि सामान्य बदली रही बाँकी भू-भागमा आंशिक बदली देखि मौसम सामान्यतया सफा रहनेछ। कर्णाली प्रदेशका थोरै स्थानहरूमा तथा कर्णाली र लुम्बिनी प्रदेशका एक-दुई स्थानमा हल्का वर्षाको सम्भावना रहेको छ । देशको उच्च पहाडी तथा हिमाली भू-भागका केही स्थानहरूमा हल्का हिमपातको सम्भावना रहेको छ ।