काठमाडौं। हिजो आइतबार काठमाडौंबाट भारतको नयाँ दिल्ली जान ठिक्क परेको नेपाल एअरलाइन्सको वाइडबडी जहाजलाई रोकेको त्रिभुवन अन्तर्राष्ट्रिय विमानस्थलले सोमबार अर्को जहाजको उडान पनि रोकेको छ । नेपाल नागरिक उड्डयन प्राधिकरणले स्वीकृत गरेको उडान तालिका अनुसार नेपाल एअरलाइन्सको तालिका नै नभएको भन्दै विमानस्थलले विहान ८ बजे नयाँ दिल्लीको लागि तय भएको उडान रद्द गरिदिएको हो । सोमबार विहान काठमाडौं- दिल्ली उडानको लागि निगमले १ सय ५० वटा टिकट विक्री गरेको थियो । “हिजो जस्तै गरी आज पनि हाम्रो विहानको उडान रोकिएको छ । हामीले हिजो नै यात्रुलाई जानकारी गराएकाले विमानस्थलमा पुगेर उहाँहरुले दुख पाउनुपरेको छैन ।” निगमकी प्रवक्ता अर्चना खड्काले भनिन्’
हिजो आइतबार पनि बोर्डिङ पास भइसकेपछि निगमको जहाजलाई रोकिएको थियो । आइतबारका २ सय ५४ जना यात्रु दिल्ली जान पाएका छैनन भने आज सोमबार विहानका थप १ सय ५० यात्रुले पनि टिकट काटेर बसेकाले उनिहरुलाई कसरी पठाउने भन्ने विषय निकै जटिल भएको खड्काको भनाई छ । निगमको दिउँसोको उडान र अरु एअरलाइन्समा पनि केहि यात्रु पठाउने तयारी भएको छ । तर यात्रु धेरै र जहाज कम हुँदा समस्या बढेको निगमले जनाएको छ ।
“केहि यात्रुलाई हामिले दिउँसोको हाम्रै उडानमा पठाउँदैछौँ, केहि यात्रुलाई दिल्ली उडान गर्ने अरु एअरलाइन्समा पनि म्यानेज गर्ने कोसिस गर्छौँ । तर हामीसँग दिल्ली जान रोकिएका यात्रु नै ३ सय २५ जना भएकाले सबैलाई पठाउन समस्या छ ।” प्रवक्ता खड्काले भनिन् ‘नेपाल नागरिक उड्डयन प्राधिकरणले भैरहवाको गौतमबुद्ध अन्तर्राष्ट्रिय विमानस्थललाई पनि बिजनेश दिन भन्दै निगमलाई हप्ताको कम्तिमा ४ वटा उडान भैरहवाबाट गर्नेगरी तालिका बनाएको छ । तर निगमले काठमाडौंबाटै नयाँ दिल्लीमा हप्ताका १४ वटै उडान गर्ने जिद्दि गरेका समस्या भएको छ ।नेपाल भ्युज
दर्शन खबर । १४ कार्तिक २०७९, सोमबार